Nú er það ljóst að Sigmundur Davíð Gunnlaugsson hefur fengið umboð Forseta Íslands til að reyna að mynda starfhæfa ríkisstjórn, langar mig prívat og persónulega, að hvetja vinstri flokkana sem náðu fólki á þing í kosningunum, Samfylkinguna, VG, Björt Framtíð og Pírata, að setjast niður og reyna að finna sameiginlegan grundvöll til að mynda meirihlutastjórn með Framsóknarflokknum. Ástæða þess að ég óska þess, er sú staðreynd að þrátt fyrir að Sjálfstæðisflokkurinn sé stæðsti flokkurinn á alþingi ásamt Framsókn er sú einfalda staðreynd að Sjálfstæðismenn og þá sérstaklega Bjarni Benediktsson, formaður flokksins, hefur sýnt af sér gífurlegan hroka, bæði í kosningabaráttunni og þá ekki síst eftir fund með Forsetan Íslands í gær, þegar hann nánast heimtaði að hann fengi umboðið strax þann sama dag svo hann gæti farið að semja við Framsóknarflokkinn.
Sjálfstæðisflokkurinn á ekki bara sjálfsagðan rétt á því að ganga inn í stjórn landsins. Sjálfstæðisflokkurinn þarf fyrst og fremst að gera upp 18 ára valdaferil sinn sem leiddi til þjóðargjaldþrots og sýna af sér auðmýkt fyrir fólkinu í landinu og læra þá lexíu að fólkið sem tekur að sér að leiða þann flokk er ekki borið og barnfætt til að stjórna landinu. Það er lýðræði á íslandi og þeim ber að virða það sem og óskir fólksins sem kýs þá á þing.
Það er því þess vegna sem ég biðla til vinstri aflana að semja sín á milli um áherslur sem yrðu til þess að hægt væri að mynda meirihlutasamstarf með Framsókn og skilja Sjálfstæðisflokkinn einann eftir í stjórnarandstöðu.
Það væri mikill akkur að því fyrir þjóðina alla.
