Ef einhverntíma hefur verið ástæða fyrir íslendinga til að skammast sín fyrir ákvarðanir stjórnvalda, þá er það í þessu máli.
Ég persónulega á ekki eitt orð yfir svona framkomu og bið því Færeyinga afsökunnar fyrir hönd þeirra handónýtu stjórnvalda sem hér ráða ríkjum og ég dauðskammast mín fyrir þá framkomu sem þeim er sýnd.
Tel einnig að meirihluti íslendinga sé æfur af reiði út af þessu.
Færeyska skipið Næraberg, sem liggur nú við bryggju við Vogabakka í Reykjavík, fær ekki olíu og aðra hefðbundna þjónustu. Skipið veiðir makríl í grænlenskri efnahagslögsögu og má því ekki koma til íslenskra hafna, eða fá þjónustu þar. Skipið fékk þó leyfi til að koma til hafnar í morgun þar sem vélarbilun kom upp í skipinu.
Í fyrstu milligrein þriðju grein laga um veiðar og vinnslu erlendra skipa í fiskveiðilandhelgi Íslands segir:
Erlendum skipum, sem stunda veiðar eða vinnslu á afla úr sameiginlegum nytjastofnum sem veiðast bæði innan og utan íslenskrar fiskveiðilandhelgi og sem íslensk stjórnvöld hafa ekki gert milliríkjasamning um nýtingu á, er þrátt fyrir ákvæði 1. mgr. óheimilt að koma til íslenskra hafna.
Komist skip sem um ræðir í þessari málsgrein til íslenskrar hafnar er þeim óheimilt að landa eða umskipa afla í höfn og skal án tafar vísa þeim úr höfn eftir að þau hafa verið skoðuð af eftirlitsaðilum og eftir atvikum veitt neyðaraðstoð. Óheimilt er að veita skipum sem um ræðir í þessari málsgrein, skipum sem flytja afla þeirra, skipum sem þjónusta þau, sem og útgerðum þessara skipa, þjónustu, þar með talið í íslenskum höfnum, í fiskveiðilandhelgi Íslands og utan hennar.
Þeir ráðherrar sem ábyrgir eru fyrir þessum ólögum og í raun svívirðilegu framkomu gagnvart frændum okkar í Færeyjum eru þau Sigurður Ingi Jóhannsson og Ragnheiður Elín Árnadóttir.
Fyrir aðgerðir þeirra sem og ríkisstjórnar íslands, tel ég mig skrifa hér fyrir meirihluta íslendinga þegar ég segi að ég hef megnustu skömm á svona lagasetningum og þess þá heldur eftirfylgni þeirra og lýsi yfir fullum stuðningi við frændur okkar í Færeyjum um leið og ég biðst einnig afsökunnar á þessari framkomu íslenskra stjórnvalda gagnvart þeirri þjóð sem studdi við bakið á okkur kjölfar efnahagshrunsins og bjargaði þjóðinni frá gjaldþroti.
Sú bakstunga sem Færeyingar fá með þessari aðgerð er stjórnvöldum á íslandi til háborinar skammar og vona ég persónulega að þau leiðrétti þetta ekki seinna en strax.
Enn og aftur bið ég Færeyinga afsökunnar á þessu fyrir hönd okkar almúgafólks á íslandi, við erum ekki þeir seku í þessu máli og styðjum ykkur 100% og höfum megnustu skömm á stjórnmálamönnum sem haga sér með þessum hætti.
