Hannes framan við helgidóminn á heimili sínu hvar hann biðst fyrir í fjóra tíma á degi hverjum. Hann á einnig ferðaaltari.
Hannes Hólmsteinn Gissurarson er alveg brjálaður og hótar að segja upp viðskiptum sínum við Gunnars Majones vegna ummæla sem Helen Gunnarsdóttir, ekki dóttir Gunnars stofnanda majonesfabrikkunar, skildi eftir í athugasemdarkerfi DV við frétt þar sem fjallað var um Hannes. Hannes taldi að þarna væri um dóttur Gunnars að ræða og ákvað á stundinni að segja upp öllum viðskiptum sínum við fyrirtækið.
Fréttin fjallaði um leiðaraskrif Davíðs Oddssonar, ritstjóra Morgunblaðsins. Í nafnlausu Reykjavíkurbréfi hafði Davíð sakað Jóhönnu Sigurðardóttur fyrrverandi forsætisráðherra um að hafa aðeins boðið einum starfsmanni forsætisráðuneytisins góðan daginn á morgnana þegar hún gegndi embætti. Helen var ein þeirra fjölmörgu sem hneykslaðist á Davíð og skrifaði: „Jahérna, núna held ég að Dabbalingur hafi náð botninum í aumu skítkasti.“
Hannesi Hólmsteini, sem er þekktur fyrir að mæra sinn gamla vin, virðist hafa blöskrað þessi athugasemd og túlkar hana sem markaðssetningu á majónesi. Hann svarar að bragði: „Ótrúlega ómerkileg athugasemd. Ég er ekki viss um, að ég kaupi aftur Gunnars majónes, ef þetta er markaðssetningin, eins og mér hefur fram að þessu fundist það gott.“
Skjáskot af upphlaupi HHG.
Helen Gunnarsdóttir er furðu lostin yfir þessari athugasemd. „Ég tengist ekkert majónesfyrirtækinu. Mér hefur oft verið ruglað saman við Helen í Gunnars Majónesi og á tímabili útvegaði ég mér farsímanúmerið hennar til að geta beint fólki í rétta átt,“ segir hún og bætir við að hún hafi verið orðin ansi þreytt á þessum eilífa misskilningi. „En þetta er nú það allra fyndnasta sem ég hef lent í hingað til,“ segir hún og vonar að athugasemd hennar um Davíð Oddsson þurfi ekki að bitna á majónesfyrirtækinu og viðskiptum þess.
Fólki til glöggvunnar á því hvaða vörur það eru sem Gunnars framleiðir og Hannes ætlar að segja upp viðskiptum sínum á er hægt að finna með því að smella hérna.
Einnig eru lesendur hvattir til að fylgjast vel með ferðum Hannesar Hólmsteins á næstunni og vera alveg klár með myndavélina, ef hann skyldi falla í þá freistni að kaupa vörur frá Gunnars og senda þær á meðfylgjandi netfang.
