MYND: RÚV.
Innanríkisráðherra Sjálfstæðisflokksins, Hanna Birna Kristjánsdóttir, talar í kvöldfréttum um að Mannréttindadómstóll Evrópu hafi tekið mál Geirs H. Haarde til „meðferðar“, og það sé til vitnis um viðurkenningu dómstólsins á því að ekki hafi verið staðið með sanngjörnum hætti eða rétt að málshöfðun á hendur ráðherranum fyrrverandi. Hér er allt rangt hjá Hönnu Birnu. Engin viðurkenning af því tagi sem innanríkisráðherra nefnir er til staðar. Auk þess er málið ekki til meðferðar heldur athugunar. Á því er grundvallarmunur.
Nær öllum málum, sem tekin eru til athugunar hjá dómstólnum er vísað frá en hin eru tekin til meðferðar og síðan dæmt.
Ósvífinn og villandi málflutningur innanríkisráðherra er hluti af viðvarandi viðleitni til að hvítþvo ráðherra hrunstjórnarinnar og Sjálfstæðisflokkinn. Það er vont að svo óheiðarlegur málflutningur berist frá innanríkisráðuneyti, ráðuneyti sem á að veita Mannréttindadómstólnum upplýsingar.
Fréttastofu Rúv ber að upplýsa almenning um þetta mál og leiðrétta rangan málflutning ráðherra.
Einnig væri óskandi að fréttamenn færu nú að spyrja ráðherra hver sé tilgangur þeirra að fara með rangt mál í fjölmiðlum og þar með ljúga hreinlega að fólkinu í landinu.